Në kuadër të Javës Evropiane të Lëvizshmërisë, Këshilli Republikan për Siguri në Komunikacionin Rrugor (KRSKRR), përveç aktiviteteve të tjera, mori pjesë në Konferencën Ndërkombëtare mbi Lëvizshmërinë e Qëndrueshme. Në Konferencë, KRSKRR-ja pati prezantimin e tij me temën: “Praktikat e mira të komunikacionit të lëvizshmërisë urbane në Maqedoni dhe Bashkimin Evropian”.
Në prezantimin e tij, Këshilli iu referua aktiviteteve dhe fushatave të deritanishme që synojnë avancimin e lëvizshmërisë urbane dhe rritjen e sigurisë së të gjithë pjesëmarrësve në komunikacion. Më pas, theks i veçantë iu vu fushatave “Në mënyrë të sigurt me biçikletë #KthehuNëMënyrëTëSigurt”, e cila synon të rrisë ndërgjegjësimin për sigurinë e çiklistëve, si dhe “#NëMënyrëTëSigurtNëTrotinet”, që synon edukimin dhe sjelljen e përgjegjshme të shoferëve të trotinetëve elektrikë.
Në mënyrë plotësuese, KRSKRR-ja informoi se anëtarët e tij marrin pjesë aktive në grupin e punës për ndryshimet dhe plotësimet në Ligjin për siguri në komunikacionin rrugor, si dhe në trupin koordinues për përgatitjen e Strategjisë së re Nacionale për Siguri në Komunikacionin Rrugor dhe Strategjisë Nacionale për Qëndrueshmërinë e Rrugëve.
Në kuadër të diskutimit, u theksua rëndësia e vozitjes së ndërgjegjshme dhe të sigurt të trotinetëve elektrikë dhe biçikletave – me mbajtjen e detyrueshme të pajisjeve mbrojtëse, duke respektuar shpejtësinë e përcaktuar dhe duke përdorur vetëm shtigjet e shënuara për biçikleta, e jo korsitë rrugore.
Me pjesëmarrjen e vet aktive në Konferencë, KRSKRR-ja e konfirmoi edhe një herë përkushtimin e vet për të promovuar lëvizshmërinë urbane të qëndrueshme dhe të sigurt, në përputhje me praktikat dhe udhëzimet evropiane.